Bidaia hasteko, Halong badian egun batzuk pasako ditugu. Lurrera bueltan, Sapa-ra igoko gara, Txinako mugatik gertu, asteroko azokan biltzen diren etnia anitzak ezagutzeko. Oinezko ibilbide batek zenbait egunez eskualdeko herrixketatik eramango gaitu eta ondoren, bertako autobusak hartuz, hegoalderantz jaisten joango gara pixkanaka. Perfume Ibaia, Danang, eta Hue eta Hoi Ann hiri inperialak bisitatuko ditugu, Ho Chi Minh hirira –lehengo Saigon- iritsi aurretik. Mekong ibaiaren deltak herrialdeko ekonomian duen garrantzi itzela ulertuko dugu. Eta gertu dagoenez, hegazkin jauzi txiki batek Angkor Wat-era eramango gaitu, khmer inperioaren maisulan arkitektonikora.
